ដេីម្បីឧបត្ថម្ភដល់ប្រជាពលរដ្ឋក្រីក្រ ជួបទុក្ខលំបាក ខ្វះខាតស្បៀង ក្នុងអំឡុងពេល ជំងឺកូវីដ១៩ នៅព្រឹកថ្ងៃពុធ ទី២៦ ខែសីហា ឆ្នាំ២០២០ ព្រះតេជគណ មហាបូទុម្ភ ផាត់ ធួក ព្រះមេគណខេត្តកែប នៃគណៈធម្មយុត្តិកនិកាយ និងជាព្រះចៅអធិការវត្តសត្ថាធម្មវិហារ (វត្តភ្នំពោន) សហការណ៍ជាមួយក្រុមហ៊ុនឯកជនចិន នាំយកនូវអំណោយទេយ្យទានរួមមាន អង្ករ មី ទឹកត្រី ទឹកស៊ីអ៊ីវ ទឹកបរិសុទ្ធ ទឹកផ្លែឈេី បាឡុងចំនួន០១ និងថវិកាចំនួន៣០០$ ជូនរដ្ឋបាលខេត្តកែប ដេីម្បីបម្រេីការងារមនុស្សធម៌ ជួយដល់ប្រជាពលរដ្ឋជួបការខ្វះខាត ក្នុងពេលប្រយុទ្ធប្រឆាំងនឹងជំងឺកូវីដ១៩ ជាមួយរដ្ឋបាលខេត្តកែប
ឯកឧត្តម សោម ពិសិដ្ឋ អភិបាលខេត្តកែប មានចិត្តរំភេីប និងថ្លែងអំណរអរគុណជាខ្លាំង ចំពោះសកម្មភាពមនុស្សធម៌ របស់ព្រះមេគណខេត្តកែប និងសប្បុរសជននានា ដែលបានជួយឧបត្ថម្ភគាំទ្រដល់រដ្ឋបាលខេត្តកែប តាមរយៈព្រះមេគណខេត្តផងដែរ។
ឯកឧត្តមបានលេីកឡេីងថា ក្រោមការដឹកនាំរបស់រាជរដ្ឋាភិបាលកម្ពុជា ដែលមានសម្ដេចតេជោ នាយករដ្ឋមន្ត្រី នៃព្រះរាជាណាចក្រកម្ពុជា បានធ្វេីអោយវិស័យពុទ្ធចក្រ និងអាណាចក្រ មានការរីកចម្រើនដេីរទន្ទឹមគ្នា ជាពិសេសព្រះពុទ្ធសាសនា បានអប់រំមនុស្សទូទៅអោយចេះគោរពស្រលាញ់ ចេះជួយទុក្ខធុរៈគ្នា ក្នុងគ្រាលំបាក។
ឆ្លៀតក្នុងឱកាសនោះដែរ ឯកឧត្តមអភិបាលខេត្តបានសំណូមពរដល់ព្រះតេជគណគ្រប់អង្គ និងណែនាំដល់មន្ទីរអង្គភាពជុំវិញខេត្ត មន្ត្រីរាជការ ប្រជាពលរដ្ឋគ្រប់រូប ត្រូវអនុវត្តឲ្យបានខ្ជាប់ខ្ជួននូវគោលការណ៍ណែនាំ រក្សាគម្លាតសង្គម និងវិធានការនានា តាមការណែនាំរបស់រាជរដ្ឋាភិបាល ជាពិសេសក្រសួងសុខាភិបាល ដេីម្បីបង្ការនឹងទប់ស្កាត់ការឆ្លងរីករាលដាលនៃជំងឺកូវីដ-១៩(COVID-19)៕
